തിരുവനന്തപുരം: ലോക്സഭ തിരഞ്ഞെടുപ്പില് തൃശ്ശൂരില് പരാജയപ്പെട്ട കെ മുരളീധരനെ രാഹുല് ഗാന്ധി ഒഴിഞ്ഞാല് വയനാട്ടിലേക്ക് പരിഗണിക്കാന് സാധ്യത. തൃശ്ശൂരിലെ ലോക്സഭാ തെരഞ്ഞെടുപ്പ് പരാജയത്തില് മുരളീധരനുണ്ടായ വിഷമം മാറ്റുകയാണ് കോണ്ഗ്രസ് നേതൃത്വത്തിന്റെ ലക്ഷ്യം. If Rahul Gandhi resigns, K Muralidharan will go to Wayanad
വടകരയിലും നേമത്തും തൃശ്ശൂരിലും അടക്കം പാര്ട്ടി പറഞ്ഞ ഇടത്തെല്ലാം എതിരുപറയാതെ മത്സരിച്ച കെ മുരളീധരന് തൃശ്ശൂരിൽ തോൽക്കുമെന്ന് പ്രതീക്ഷിച്ചിരുന്നില്ല. പൊതുരംഗത്തില്ലെന്ന് സങ്കടത്തോടെ പറഞ്ഞാണ് അദ്ദേഹം തെരഞ്ഞെടുപ്പ് തോൽവിയോട് പ്രതികരിച്ചത്.
മുതിര്ന്ന നേതാക്കള് പലരും ഫോണില് വിളിച്ച് അനുനയിപ്പിക്കുന്നുണ്ടെങ്കിലും വിഷമം മാറിയിട്ടില്ല. ഈ സാഹചര്യത്തിൽ സുരക്ഷിതമായൊരു പദവി മുരളിക്ക് നല്കണമെന്നാണ് മുന്നണി നേതാക്കള്പോലും പറയുന്നത്.
റായ്ബറേലിയിലും ജയിച്ച രാഹുല് ഗാന്ധി വയനാട് മണ്ഡലത്തിലെ അംഗത്വം രാജി വച്ചാല് കെ മുരളീധരന് വരട്ടെയെന്നാണ് നിര്ദേശം. മുന്പ് ഡിഐസി കാലത്ത്, ഇരു മുന്നണികള്ക്കുമെതിരെ മത്സരിച്ച് മിന്നുന്ന പ്രകടനം വയനാട്ടില് മുരളീധരന് കാഴ്ചവെച്ചിട്ടുണ്ട്.
വയനാട് ലോക്സഭ സീറ്റിലേക്ക് വീണ്ടും തിരഞ്ഞെടുപ്പ് നടത്തേണ്ടിവരും. ഈ ഒഴിവിലേക്ക് മുരളിയെ പരിഗണിക്കണമെന്ന ആവശ്യം പാര്ട്ടിയിലും മുന്നണിയിലും ശക്തമായിരിക്കുകയാണ്. കെ മുരളീധരന് ഉന്നത പദവി നല്കണമെന്ന ആവശ്യവുമായി കോഴിക്കോട് ജില്ലാ കോണ്ഗ്രസ് കമ്മിറ്റി രംഗത്തെത്തിയിരിക്കുകയാണ്.
മുരളീധരനെ വയനാട്ടില് പരിഗണിക്കണമെന്ന് മുസ്ലിം ലീഗ് നേതൃത്വവും ആവശ്യപ്പെട്ടു. ഇതിനിടയിലാണ് അദ്ദേഹം വയനാട്ടില് മത്സരിക്കുകയാണെങ്കില് പൂര്ണ്ണ പിന്തുണ പ്രഖ്യാപിച്ച് കോഴിക്കോട് ജില്ലാ കമ്മിറ്റി രംഗത്തെത്തിയിരിക്കുന്നത്.
എന്നാൽ രാഹുൽ ഗാന്ധിയുടെ അസാന്നിധ്യത്തിൽ പ്രിയങ്ക ഗാന്ധി ഇല്ലെങ്കില് മാത്രമേ മുരളീധരനെ സ്ഥാനാര്ഥിയാക്കുന്നത് പരിഗണിക്കൂ. എന്നാൽ വയനാട്ടിൽ മത്സരിക്കാൻ കെ മുരളീധരന് തയ്യാറാകുമോ എന്നതും നിശ്ചയമില്ല.