തിരുവനന്തപുരം: നടി പ്രവീണയുടെ ചിത്രങ്ങള് മോര്ഫ് ചെയ്ത് പ്രചരിപ്പിച്ചയാള് അറസ്റ്റില്. ഡല്ഹിയില് താമസിക്കുന്ന തമിഴ്നാട് സ്വദേശിയായ ഭാഗ്യരാജ് ആണ് അറസ്റ്റിലായത്.cyber attack against actress praveena
തിരുവനന്തപുരം സിറ്റി സൈബര് പൊലീസാണ് പ്രതിയെ ദില്ലിയില് വെച്ച് അറസ്റ്റ് ചെയ്തത്. ഭാഗ്യരാജിനെ മുമ്പും പ്രവീണയുടെ മോര്ഫ് ചെയ്ത ചിത്രങ്ങള് പ്രചരിപ്പിച്ചതിന് അറസ്റ്റ് ചെയ്തിരുന്നു. 2021 നവംബറിലാണ് ഇതിന് മുമ്പ് ദില്ലി സാഗര്പുര് സ്വദേശി ഭാഗ്യരാജ് (24) അറസ്റ്റിലായിരുന്നത്.
നടി പ്രവീണയുടെ പേരില് വ്യാജ ഇന്സ്റ്റാഗ്രാം അക്കൗണ്ട് ഉണ്ടാക്കി അതുവഴിയാണ് ഇയാള് പ്രവീണയുടെ മോര്ഫ് ചെയ്ത ചിത്രങ്ങള് പ്രചരിപ്പിച്ചിരുന്നത്.
അറസ്റ്റിലായെങ്കിലും പിന്നീട് ജാമ്യത്തില് വിട്ടയക്കുകയായിരുന്നു. ജാമ്യത്തില് പോയശേഷവും ഇയാള് കുറ്റകൃത്യം തുടരുകയാണെന്നും തന്റെ മകളുടേത് അടക്കമുള്ള ഫോട്ടോകള് അശ്ലീലമായി ഇയാള് പ്രചരിപ്പിക്കുന്നുണ്ടെന്നും കഴിഞ്ഞ മാസം നടി പ്രവീണ വെളിപ്പെടുത്തിയിരുന്നു.
“എന്റെയും എന്റെ വീട്ടുകാരുടെയും മോർഫ് ചെയ്ത ഫോട്ടോകള്, എന്റെ തലയും താഴേക്ക് വികൃതരൂപമായി, വൃത്തികെട്ട രീതിയില് എന്ന് തന്നെ പറയാം. വസ്ത്രമില്ലാതെ നില്ക്കുന്നവരുടെ ഫോട്ടോ എടുത്ത് അതില് എന്റെ ഫോട്ടോസ് വച്ച് പ്രചരിപ്പിക്കുകയാണ്. അവനത് കണ്ട് ആസ്വദിക്കുന്നത് മാത്രമല്ല പ്രചരിപ്പിക്കുകയാണ്”, എന്നായിരുന്നു പ്രവീണയുടെ വെളിപ്പെടുത്തല്.