തിരുവനന്തപുരം: നടനും മുന് അമ്മ ജനറല് സെക്രട്ടറിയുമായ സിദ്ദിഖിനെതിരായ ലൈംഗികാതിക്രമ കേസില് കുരുക്ക് മുറുകുന്നു. നടിയുടെ മൊഴിയുടെ അടിസ്ഥാനത്തില് നടത്തിയ അന്വേഷണത്തില് നിര്ണായക തെളിവുകള് പ്രത്യേക അന്വേഷണ സംഘത്തിന് ലഭിച്ചു.Siddique and the actress in same hotel, investigative team collected crucial evidence
ഒരേ സമയം തിരുവനന്തപുരത്തെ മസ്കറ്റ് ഹോട്ടലില് ഇരുവരും ഉണ്ടായിരുന്നതിന്റെ വിവരങ്ങളാണ് പൊലീസിന് ലഭിച്ചത്. മസ്കറ്റ് ഹോട്ടലിലെ രജിസ്റ്ററില് സിദ്ദിഖിന്റെയും നടിയുടേയും പേരുകളുണ്ടെന്ന് അന്വേഷണസംഘം സ്ഥിരീകരിച്ചു.
കന്റോണ്മെന്റ് അസിസ്റ്റന്റ് കമ്മീഷണറുടെ നേതൃത്വത്തിലായിരുന്നു ഹോട്ടലില് പരിശോധന നടത്തി തെളിവു ശേഖരിച്ചത്.
പരാതിയില് പറയുന്ന പ്രിവ്യു ഷോയ്ക്കും ഇരുവരുമുണ്ടായിരുന്നു. 2016-ലാണ് ഹോട്ടലില് വെച്ച് തന്നെ പീഡിപ്പിച്ചത് എന്നാണ് നടിയുടെ പരാതിയില് പറയുന്നത്. കേസില് യുവനടി നല്കിയ മൊഴിയുടെ വിശദാംശങ്ങള് പുറത്തുവന്നിരുന്നു.
സിനിമയെക്കുറിച്ച് ചര്ച്ചചെയ്യാനെന്ന് പറഞ്ഞ് സിദ്ദിഖ് തിരുവനന്തപുരത്തെ മസ്കറ്റ് ഹോട്ടലിലേക്ക് ക്ഷണിച്ചു. ഇതിന്റെ അടിസ്ഥാനത്തില് ഹോട്ടലിലെ റിസപ്ഷനില് അതിഥി രജിസ്റ്ററില് ഒപ്പു വെച്ചശേഷമാണ് സിദ്ദിഖിന്റെ മുറിയിലേക്ക് പോയത് എന്നും നടി പൊലീസിന് മൊഴി നല്കിയിരുന്നു.
ഹോട്ടലിലെ ഒന്നാം നിലയിലായിരുന്നു സിദ്ദിഖിന്റെ മുറി. ആ മുറിയില് വെച്ചാണ് ക്രൂരമായ പീഡനത്തിന് ഇരയായതെന്ന് നടി മൊഴി നല്കിയിട്ടുണ്ട്. നിള തിയേറ്ററില് നടന്ന പ്രിവ്യൂ ഷോയില് അച്ഛനും അമ്മയ്ക്കും ഒപ്പം വന്ന പെണ്കുട്ടിയെ കണ്ടിരുന്നതായി സിദ്ദിഖ് നല്കിയ പരാതിയിലും വ്യക്തമാക്കിയിരുന്നു.
