തിരുവനന്തപുരം: മലയാള സിനിമാരംഗത്ത് സ്ത്രീകള് നേരിടുന്ന പ്രശ്നങ്ങളെക്കുറിച്ച് പഠിച്ച ജസ്റ്റിസ് ഹേമ കമ്മിറ്റി റിപ്പോര്ട്ടിലെ, വിവരാവകാശ കമ്മീഷന് നിര്ദേശിച്ചതിലും കൂടുതല് ഭാഗങ്ങള് സര്ക്കാര് പുറത്തുവിടാതെ മറച്ചുവെച്ചതില് വിവാദം.Government Sparks Controversy by Omitting Key Sections from Hema Committee Report
21 പാരഗ്രാഫുകള് ഒഴിവാക്കാൻ ആവശ്യപ്പെട്ടപ്പോള് 129 പാരഗ്രാഫുകളാണ് സർക്കാർ ഒഴിവാക്കിയത്.
റിപ്പോര്ട്ടിലെ 49 മുതല് 53 വരെയുള്ള പേജുകള് സര്ക്കാര് ഒഴിവാക്കി. ആകെ 129 പാരഗ്രാഫുകളാണ് സര്ക്കാര് ഒഴിവാക്കിയത്. ഇത് ഒഴിവാക്കിയുള്ള റിപ്പോര്ട്ടാണ് സര്ക്കാര് പുറത്തുവിട്ടത്. 21 പാരഗ്രാഫുകള് ഒഴിവാക്കാനാണ് വിവരാവകാശ കമ്മീഷൻ നിർദ്ദേശിച്ചത്. ഇതിന് വിരുദ്ധമായാണ് സര്ക്കാരിന്റെ വെട്ടിനീക്കല്. സുപ്രധാന വിവരങ്ങള് സർക്കാർ മറച്ചുവെച്ചുവെന്നാണ് ആക്ഷേപം.
വിവരാവകാശ നിയമ പ്രകാരം റിപ്പോര്ട്ടിന്റെ പകര്പ്പിനായി അപേക്ഷകർക്ക് നല്കിയ അറിയിപ്പിലും ഈ ഭാഗം ഒഴിവാക്കുന്നത് വ്യക്തമാക്കിയിരുന്നില്ല.
അതേസമയം സ്വകാര്യതയെ മാനിച്ചാണ് റിപ്പോര്ട്ടില് നിന്നും കൂടുതല് ഭാഗങ്ങള് ഒഴിവാക്കിയതെന്നാണ് സര്ക്കാര് നല്കുന്ന വിശദീകരണം. സ്വകാര്യ വിവരങ്ങള് പുറത്തുവിടരുതെന്ന് വിവരവകാശ കമ്മീഷന് നിര്ദ്ദേശിച്ചിട്ടുണ്ട്. ഇതുപരിഗണിച്ചാണ് കൂടുതല് പാരഗ്രാഫുകള് പുറത്തുവിടുന്നതില് നിന്നും ഒഴിവാക്കിയതെന്നും സര്ക്കാര് വൃത്തങ്ങള് പറയുന്നു. ഹേമ കമ്മിറ്റി റിപ്പോര്ട്ടിന്റെ പൂര്ണരൂപം സമര്പ്പിക്കാന് ഹൈക്കോടതി സര്ക്കാരിനോട് ആവശ്യപ്പെട്ടിട്ടുണ്ട്.
